ਚਾਹ ਦੀਆਂ ਪੱਤੀਆਂ ਦੀ ਕੀਮਤ 'ਚ ਹੋਇਆ ਵਾਧਾ
ਔਸਤਨ 4 ਰੁਪਏ ਪ੍ਰਤੀ ਕਿਲੋ ਵਧ ਕੇ ਹੋਈ 159 ਰੁਪਏ ਪ੍ਰਤੀ ਕਿਲੋ
ਨਵੀਂ ਦਿੱਲੀ : ਉਤਰ ਭਾਰਤ 'ਚ ਚਾਹ ਦੀਆਂ ਵਧਦੀਆਂ ਕੀਮਤਾਂ ਅਤੇ ਸ੍ਰੀਲੰਕਾ 'ਚ ਜਾਰੀ ਆਰਥਿਕ ਸੰਕਟ ਕਾਰਨ ਵਿਦੇਸ਼ੀ ਖ਼ਰੀਦਦਾਰਾਂ ਦਾ ਰੁਖ਼ ਕੋਚੀ ਵਲ ਮੁੜਿਆ ਹੈ | ਹੁਣ ਵਿਦੇਸ਼ੀ ਖ਼ਰੀਦਦਾਰ ਕੋਚੀ ਤੋਂ ਵੱਡੀ ਮਾਤਰਾ 'ਚ ਚਾਹ ਖ਼ਰੀਦ ਰਹੇ ਹਨ |
ਇਨ੍ਹਾਂ 'ਚ ਖ਼ਾਸ ਤੌਰ 'ਤੇ ਈਰਾਨ ਅਤੇ ਤੁਰਕੀ ਸ਼ਾਮਲ ਹਨ | ਵਪਾਰੀਆਂ ਨੇ ਦਸਿਆ ਕਿ ਕੋਲਕਾਤਾ ਵੀ ਨੀਲਾਮੀ 'ਚ ਦੂਜੀ ਵਾਰ ਦੀ ਤੁੜਾਈ ਵਾਲੀਆਂ ਪੱਤੀਆਂ ਦੀਆਂ ਕੀਮਤਾਂ 350-450 ਰੁਪਏ ਪ੍ਰਤੀ ਕਿਲੋ ਦੇ ਲਗਭਗ ਬਣੀਆਂ ਹੋਈਆਂ ਹਨ | ਇਸੇ ਕਾਰਨ ਵਿਦੇਸ਼ੀ ਖ਼ਰੀਦਦਾਰ ਨਾ ਸਿਰਫ਼ ਈਰਾਨ ਤੋਂ ਸਗੋਂ ਤੁਰਕੀ ਅਤੇ ਰੂਸ ਵਰਗੇ ਦੇਸ਼ਾਂ ਤੋਂ ਵੀ ਦਖਣੀ ਭਾਰਤ ਦੇ ਬਾਜ਼ਾਰਾਂ 'ਚੋਂ ਚਾਹ ਖ਼ਰੀਦ ਰਹੇ ਹਨ |
ਹਾਲ ਹੀ 'ਚ ਤੁਰਕੀ ਨੇ ਭਾਰਤੀ ਕਣਕ ਦੀ ਖੇਪ ਨੂੰ ਇਹ ਕਹਿ ਕੇ ਮੋੜ ਦਿਤਾ ਸੀ ਕਿ ਇਸ 'ਚ ਰੁਬੇਲਾ ਵਾਇਰਸ ਪਾਇਆ ਗਿਆ ਹੈ | ਹੁਣ ਉਸ ਨੇ ਚਾਹ ਦੀ ਖ਼ਰੀਦ ਲਈ ਭਾਰਤੀ ਬਾਜ਼ਾਰ ਦਾ ਰੁਖ਼ ਕੀਤਾ ਹੈ | ਇਕ ਰਿਪੋਰਟ ਮੁਤਾਬਕ ਨੀਲਗਿਰੀ ਦੀਆਂ ਪੱਤੀਆਂ ਦੀ ਚੰਗੀ ਮੰਗ ਦੇਖਣ ਨੂੰ ਮਿਲ ਰਹੀ ਹੈ | ਨਾਲ ਹੀ ਕੀਮਤਾਂ 'ਚ ਵੀ ਵਾਧਾ ਹੋਇਆ ਹੈ | ਚਾਹ ਦੀਆਂ ਪੱਤੀਆਂ ਦੀ ਕੀਮਤ ਔਸਤਨ 4 ਰੁਪਏ ਪ੍ਰਤੀ ਕਿਲੋ ਵਧ ਕੇ 159 ਰੁਪਏ ਪ੍ਰਤੀ ਕਿਲੋ ਹੋ ਗਈਆਂ ਹਨ | ਨਾਲ ਹੀ ਗ੍ਰੇਡ 'ਚ ਦਿਤੀ ਜਾਣ ਵਾਲੀ ਚਾਹ ਦੀ ਮਾਤਰਾ 'ਚ ਵੀ ਵਾਧਾ ਹੋਇਆ ਹੈ |
