ਛੱਤੀਸਗੜ੍ਹ ਦੇ 15 ਪਿੰਡਾਂ ਵਿਚ ਐਂਬੂਲੈਂਸ ਦੀ ਪਹੁੰਚ ਵਾਸਤੇ ਸੜਕ ਹੀ ਨਹੀਂ
ਰਾਏਪੁਰ, 26 ਅਗੱਸਤ : ਛੱਤੀਸਗੜ੍ਹ ਦੇ ਸੂਰਜਪੁਰ ਜ਼ਿਲ੍ਹੇ ਵਿਚ ਬੀਮਾਰ ਔਰਤ ਅਤੇ ਉਸ ਦੇ ਨਵਜਨਮੇ ਬੱਚੇ ਨੂੰ ਐਂਬੂਲੈਂਸ ਤਕ ਪਹੁੰਚਾਣ ਲਈ ਪਿੰਡ ਵਾਲਿਆਂ ਨੇ ਉਨ੍ਹਾਂ ਨੂੰ ਟੋਕਰੀ ਵਿਚ ਬਿਠਾ ਕੇ ਛੇ ਕਿਲੋਮੀਟਰ ਲੰਮਾ ਰਸਤਾ ਪੈਦਲ ਤੈਅ ਕੀਤਾ। ਦੋਹਾਂ ਦੀ ਹਾਲਤ ਸਥਿਰ ਹੈ। ਜ਼ਿਲ੍ਹੇ ਦੇ ਅਧਿਕਾਰੀਆਂ ਮੁਤਾਬਕ ਐਂਬੂਲੈਂਸ ਦਾ ਸੰਘਣੇ ਜੰਗਲਾਂ ਵਿਚਾਲੇ ਵਸੇ ਪਿੰਡ ਤਕ ਪਹੁੰਚਣਾ ਸੰਭਵ ਨਹੀਂ ਸੀ, ਇਸ ਲਈ ਇਹ ਯਤਨ ਕੀਤਾ ਗਿਆ। ਉਨ੍ਹਾਂ ਕਿਹਾ ਕਿ ਸਰਕਾਰ ਹਰ ਪਿੰਡ ਤਕ ਸੜਕ ਬਣਾਉਣ ਬਾਰੇ ਵਿਚਾਰ ਕਰ ਰਹੀ ਹੈ। ਪਿੰਡ ਬੈਜਨਪਾਠ ਦੇ ਵਾਸੀ ਕ੍ਰਿਸ਼ਨਾ ਪ੍ਰਸਾਦ ਨੇ ਦਸਿਆ ਕਿ ਉਸ ਦੀ ਪਤਨੀ 22 ਸਾਲਾ ਰਾਮਦਸੀਆ ਨੇ ਇਸੇ ਮਹੀਨੇ ਬੱਚੇ ਨੂੰ ਜਨਮ ਦਿਤਾ ਹੈ।
image
ਬੱਚੇ ਦੇ ਜਨਮ ਮਗਰੋਂ ਹੀ ਮਾਂ ਦੀ ਹਾਲਤ ਠੀਕ ਨਹੀਂ ਸੀ। ਜਦ ਸੋਮਵਾਰ ਨੂੰ ਉਸ ਨੂੰ ਹਸਪਤਾਲ ਲਿਜਾਣ ਦੀ ਨੌਬਤ ਆਈ ਤਾਂ ਪਿੰਡ ਤਕ ਐਂਬੂਲੈਂਸ ਦਾ ਪਹੁੰਚਣਾ ਮੁਸ਼ਕਲ ਹੋ ਗਿਆ ਸੀ। ਬਾਅਦ ਵਿਚ ਰਿਸ਼ਤੇਦਾਰਾਂ ਦੀ ਮਦਦ ਨਾਲ ਦੋਹਾਂ ਨੂੰ ਟੋਕਰੀ ਵਿਚ ਲੱਦ ਕੇ ਐਂਬੂਲੈਂਸ ਤਕ ਪਹੁੰਚਾਇਆ। ਯਾਦਵ ਨੇ ਦਸਿਆ ਕਿ ਸੋਮਵਾਰ ਨੂੰ ਉਸ ਦੀ ਪਤਨੀ ਦੀ ਹਾਲਤ ਵਿਗੜੀ ਤਦ ਉਨ੍ਹਾਂ ਸਥਾਨਕ ਸਿਹਤ ਕੇਂਦਰ ਨੂੰ ਸੂਚਨਾ ਦਿਤੀ ਪਰ ਜਾਣਕਾਰੀ ਮਿਲੀ ਕਿ ਐਂਬੂਲੈਂਸ ਉਥੇ ਤਕ ਨਹੀਂ ਪਹੁੰਚ ਸਕਦੀ। ਫਿਰ ਕਾਂਵੜ ਸਹਾਰੇ ਛੇ ਕਿਲੋਮੀਟਰ ਦੂਰ ਪੈਂਦੇ ਪਿੰਡ ਖੋਹਰੀ ਤਕ ਪਹੁੰਚਾਇਆ ਗਿਆ ਤੇ ਉਥੋਂ ਦੋਹਾਂ ਨੂੰ ਬਿਹਾਰਪੁਰ ਪਿੰਡ ਦੇ ਸਿਹਤ ਕੇਂਦਰ ਵਿਚ ਦਾਖ਼ਲ ਕਰਾਇਆ ਗਿਆ।
ਜ਼ਿਲ੍ਹੇ ਦੇ ਕੁਲੈਕਅਰ ਰਣਬੀਰ ਸ਼ਰਮਾ ਨੇ ਦਸਿਆ ਕਿ ਮੱਧ ਪ੍ਰਦੇਸ਼ ਦੀ ਹੱਦ ਨਾਲ ਲੱਗੇ ਓੜਗੀ ਇਲਾਕੇ ਵਿਚ ਲਗਭਗ 15 ਪਿੰਡ ਹਨ। ਇਨ੍ਹਾਂ ਪਿੰਡਾਂ ਵਿਚ ਚਾਰ ਪਹੀਆ ਵਾਹਨਾਂ ਦੀ ਪਹੁੰਚ ਲਈ ਸੜਕ ਨਹੀਂ ਹੈ। ਸ਼ਰਮਾ ਨੇ ਕਿਹਾ ਕਿ ਉਹ ਅਗਲੇ ਦੋ-ਤਿੰਨ ਦਿਨਾਂ ਵਿਚ ਉਕਤ ਪਿੰਡ ਦਾ ਦੌਰਾ ਕਰਨਗੇ। (ਏਜੰਸੀ)
