ਇਕ ਸਾਬਕਾ ਮੰਤਰੀ ਨੇ ਦਿਤੀ ਸੱਭ ਤੋਂ ਪਹਿਲਾਂ ਇਸ ਦੇ ਹੱਲ ਦੀ ਸਲਾਹ
ਚੰਡੀਗੜ੍ਹ (ਪ੍ਰਮੋਦ ਕੌਸ਼ਲ): ਭਾਜਪਾ ਪੰਜਾਬ ਦੀ ਦੋ ਦਿਨੀਂ ਪ੍ਰਦੇਸ਼ ਕਾਰਜਕਾਰਨੀ ਦੀ ਮੀਟਿੰਗ ਐਤਵਾਰ ਨੂੰ ਚੰਡੀਗੜ੍ਹ ਵਿਖੇ ਸਮਾਪਤ ਹੋਈ ਜਿਸ ਵਿਚ ਪਾਰਟੀ ਦੇ ਇੰਚਾਰਜਾਂ, ਸੂਬਾ ਪ੍ਰਧਾਨ ਸਮੇਤ ਹੋਰ ਅਹੁਦੇਦਾਰ ਉਚੇਚੇ ਤੌਰ ਉਤੇ ਪਹੁੰਚੇ। ਦਸਿਆ ਜਾ ਰਿਹਾ ਕਿ ਪੰਜਾਬ ਭਾਜਪਾ ਦੀ ਮੀਟਿੰਗ ਵਿਚ ਖੇਤੀ ਕਾਨੂੰਨਾਂ ਦੇ ਵਿਰੋਧ ਵਿਚ ਚੱਲ ਰਿਹਾ ਕਿਸਾਨ ਅੰਦੋਲਨ ਪੂਰੀ ਤਰ੍ਹਾਂ ਨਾਲ ਹਾਵੀ ਰਿਹਾ।
BJP Punjab
ਸੂਤਰਾਂ ਦੀ ਮੰਨੀਏ ਤਾਂ ਪੰਜਾਬ ਭਾਜਪਾ ਦੀ ਮੀਟਿੰਗ ਵਿਚ ਜਿੱਥੇ ਭਾਜਪਾ ਆਗੂਆਂ ਨੂੰ ਲੋਕਾਂ ਵਿਚ ਜਾ ਕੇ ਪਾਰਟੀ ਦਾ ਏਜੰਡਾ ਪਹੁੰਚਾਉਣ ਲਈ ਪ੍ਰੇਰਿਆ ਗਿਆ ਅਤੇ ਨਾਲ ਹੀ ਖੇਤੀ ਕਾਨੂੰਨਾਂ ਦੇ ਮਸਲੇ ਤੇ ਵੀ ਲੋਕਾਂ ਨਾਲ ਗੱਲ ਕਰਨ ਦੀ ਸਲਾਹ ਪਾਰਟੀ ਆਗੂਆਂ ਨੇ ਹੇਠਲੀ ਲੀਡਰਸ਼ਿਪ ਨੂੰ ਦਿਤੀ ਪਰ ਬਾਵਜੂਦ ਇਸ ਦੇ ਕੁੱਝ ਆਗੂ ਕਿਸਾਨ ਅੰਦੋਲਨ ਅਤੇ ਪਾਰਟੀ ਨਾਲੋਂ ਵਖਰੀ ਰਾਏ ਰੱਖਦੇ ਨੇ ਅਤੇ ਇਸ ਮੀਟਿੰਗ ਵਿਚ ਵੀ ਇਹ ਗੱਲ ਦੇਖਣ ਨੂੰ ਮਿਲੀ ਹੈ।
BJP
ਸੂਤਰਾਂ ਦੀ ਮੰਨੀਏ ਤਾਂ ਭਾਜਪਾ ਦੇ ਇਕ ਸਾਬਕਾ ਮੰਤਰੀ ਨੇ ਇਸ ਮੀਟਿੰਗ ਵਿਚ ਕਿਸਾਨ ਅੰਦੋਲਨ ਨੂੰ ਲੈ ਕੇ ਖ਼ੂਬ ਬੇਬਾਕੀ ਨਾਲ ਅਪਣੀ ਰਾਏ ਰੱਖਦੇ ਹੋਏ ਕਿਹਾ ਕਿ ਪਾਰਟੀ ਨੂੰ ਇਸ ਅੰਦੋਲਨ ਕਰ ਕੇ ਪੰਜਾਬ ਵਿਚ ਬਹੁਤ ਨੁਕਸਾਨ ਹੋ ਰਿਹਾ ਹੈ ਅਤੇ ਪਾਰਟੀ ਦੇ ਵਰਕਰ ਅਤੇ ਲੀਡਰ ਪਿੰਡਾਂ ਵਿਚ ਨਹੀਂ ਸਕਦੇ। ਉਕਤ ਆਗੂ ਨੇ ਠੋਕ ਵਜਾ ਕੇ ਕਿਹਾ ਕਿ ਜਿਹੜੇ ਆਗੂਆਂ ਨੇ ਕਿਸਾਨ ਜਥੇਬੰਦੀਆਂ ਦੇ ਆਗੂਆਂ ਅਤੇ ਕਿਸਾਨਾਂ ਲਈ ਨਕਸਲੀ, ਖ਼ਾਲਿਸਤਾਨੀ ਵਰਗੇ ਸ਼ਬਦਾਂ ਦੀ ਵਰਤੋਂ ਕੀਤੀ ਹੈ, ਉਸ ਦਾ ਨੁਕਸਾਨ ਪੰਜਾਬ ਵਿਚ ਭਾਜਪਾ ਨੂੰ ਜੋ ਹੋਇਆ ਹੈ ਉਸ ਦਾ ਕਿਸੇ ਨੇ ਅੰਦਾਜ਼ਾ ਵੀ ਨਹੀਂ ਸੀ ਲਾਇਆ।
BJP Punjab
ਦਸਿਆ ਜਾ ਰਿਹਾ ਹੈ ਕਿ ਉਕਤ ਭਾਜਪਾ ਆਗੂ ਨੇ ਸਪੱਸ਼ਟ ਸ਼ਬਦਾਂ ਵਿਚ ਕਿਹਾ ਕਿ ਜੇਕਰ ਪੰਜਾਬ ਵਿਚ ਭਾਜਪਾ ਨੂੰ ਸਟੈਂਡ ਕਰਨਾ ਹੈ ਤਾਂ ਸੱਭ ਤੋਂ ਪਹਿਲਾਂ ਖੇਤੀ ਕਾਨੂੰਨਾਂ ਵਾਲੇ ਮਸਲੇ ਦਾ ਹੱਲ ਕਰਨਾ ਚਾਹੀਦਾ ਹੈ ਤਾਂ ਬਾਰਡਰਾਂ ਉਤੇ ਬੈਠੇ ਕਿਸਾਨਾਂ ਦਾ ਧਰਨਾ ਸਮਾਪਤ ਹੋ ਸਕੇ ਅਤੇ ਜਦੋਂ ਇਹ ਹੋ ਗਿਆ ਤਾਂ ਪਾਰਟੀ ਦੀ ਪੋਜ਼ੀਸ਼ਨ ਅਪਣੇ ਆਪ ਬਿਹਤਰ ਹੋ ਜਾਣੀ ਹੈ।
Farmers Protest
ਸੂਤਰਾਂ ਮੁਤਾਬਕ ਜਦੋਂ ਉਕਤ ਆਗੂ ਵਲੋਂ ਇਹ ਸੱਭ ਗੱਲਾਂ ਕਹੀਆਂ ਜਾ ਰਹੀਆਂ ਸਨ ਤਾਂ ਮੀਟਿੰਗ ਵਿਚ ਬੈਠੇ ਵਰਕਰਾਂ ਵਿਚੋਂ ਵੱਡੀ ਗਿਣਤੀ ਵਿਚ ਭਾਜਪਾ ਵਰਕਰਾਂ ਨੇ ਉਕਤ ਆਗੂ ਦੀ ਹਿਮਾਇਤ ਕਰਦਿਆਂ ਖ਼ੂਬ ਤਾੜੀਆਂ ਵੀ ਮਾਰੀਆਂ ਜਿਸ ਤੋਂ ਸਾਫ਼ ਹੈ ਕਿ ਖੇਤੀ ਕਾਨੂੰਨਾਂ ਦਾ ‘ਸੇਕ’ ਪੰਜਾਬ ਭਾਜਪਾ ਨੂੰ ਵੱਡੇ ਪੱਧਰ ਉਤੇ ਲਗਿਆ ਹੈ ਅਤੇ ਪਹਿਲਾਂ ਹੀ ਅਕਾਲੀ ਦਲ ਦੇ ‘ਰਹਿਮੋ ਕਰਮ’ ਤੇ ਪੰਜਾਬ ਵਿਚ ਸੱਤਾ ਸੁਖ ਪ੍ਰਾਪਤ ਕਰਨ ਵਾਲੀ ਭਾਜਪਾ ਅਤੇ ਉਸ ਦੇ ਆਗੂਆਂ ਨੂੰ ਸੱਤਾ ਸੁਖ ਤਾਂ ਦੂਰ ਦੀ ਗੱਲ ਟਿਕਟਾਂ ਲਈ ਉਮੀਦਵਾਰਾਂ ਦਾ ‘ਤੋਟਾ’ ਪੈਣ ਦਾ ਡਰ ਤਾਂ ਸਤਾ ਹੀ ਰਿਹਾ ਹੈ ਨਾਲ ਹੀ ਪੰਜਾਬ ਵਾਸੀਆਂ ਦੇ ਰੋਹ ਕਿਵੇਂ ਸ਼ਾਂਤ ਕੀਤਾ ਜਾਵੇ ਇਹ ਵੀ ਇਕ ਵੱਡੀ ਚਿੰਤਾ ਦਾ ਵਿਸ਼ਾ ਹੈ।
PM Modi
ਪਾਰਟੀ ਦੇ ਅੰਦਰ ਜੇਕਰ ਅਜਿਹੀ ਗੱਲ ਹੈ ਤਾਂ ਹੁਣ ਦੇਖਣਾ ਹੋਵੇਗਾ ਕਿ ਇਸ ਮੀਟਿੰਗ ਵਿਚ ਪਾਰਟੀ ਹਾਈਕਮਾਨ ਵਲੋਂ ਆਏ ਆਗੂ ਇਹ ਗੱਲ ਹਾਈਕਮਾਨ ਰਾਹੀਂ ਕੇਂਦਰ ਸਰਕਾਰ ਤਕ ਕਿਵੇਂ ਪਹੁੰਚਾਉਂਦੇ ਹਨ ਅਤੇ ਕੀ ਇਸ ਮਸਲੇ ਦਾ ਹੱਲ ਕਰਵਾਉਣ ਵਿਚ ਸਫ਼ਲ ਹੁੰਦੇ ਹਨ ਜਾਂ ਨਹੀਂ? ਇੱਥੇ ਦਸਣਾ ਬਣਦਾ ਹੈ ਕਿ ਕੁੱਝ ਦਿਨਾਂ ਤੋਂ ਪੰਜਾਬ ਭਾਜਪਾ ਵਿਚ ਫੇਰਬਦਲ ਦੀਆਂ ਕਿਆਸ ਅਰਾਈਆਂ ਚੱਲ ਰਹੀਆਂ ਹਨ ਅਤੇ ਜਿਸ ਭਾਜਪਾ ਦੇ ਸਾਬਕਾ ਮੰਤਰੀ ਵਲੋਂ ਖੇਤੀ ਕਾਨੂੰਨਾਂ ਨੂੰ ਲੈ ਕੇ ਇਹ ਗੱਲ ਮੀਟਿੰਗ ਵਿਚ ਚੁੱਕੀ ਗਈ ਹੈ, ਇਸ ਆਗੂ ਦਾ ਨਾਮ ਵੀ ਕਿਸੇ ਵੱਡੀ ਜ਼ਿੰਮੇਦਾਰੀ ਲਈ ਚੱਲ ਰਿਹਾ ਹੈ, ਅਜਿਹਾ ਵੀ ਸਾਡੇ ਸੂਤਰਾਂ ਵਲੋਂ ਦਸਿਆ ਜਾ ਰਿਹਾ ਹੈ ਅਤੇ ਅਜਿਹੇ ਹਾਲਾਤ ਵਿਚ ਕੀ ਉਕਤ ਆਗੂ ਦੀਆਂ ਗੱਲਾਂ ਨੂੰ ‘ਤਵੱਜੋਂ’ ਦਿਤੀ ਜਾਵੇਗੀ ? ਇਹ ਇਕ ਵੱਡਾ ਸਵਾਲ ਵੀ ਜ਼ਰੂਰ ਹੈ।
