ਆਰਐਸਐਸ ਦੇ ਮੁਖੀ ਮੋਹਨ ਭਾਗਵਤ ਦੇ ਰਾਮ ਮੰਦਰ, ਹਿੰਦੂਤਵ ਅਤੇ ਕੁੱਝ ਹੋਰ ਮੁੱਦਿਆਂ ਬਾਰੇ ਦਿਤੇ ਗਏ ਬਿਆਨਾਂ 'ਤੇ ਕਾਂਗਰਸ ਨੇ ਕਿਹਾ ਹੈ.........
ਨਵੀਂ ਦਿੱਲੀ : ਆਰਐਸਐਸ ਦੇ ਮੁਖੀ ਮੋਹਨ ਭਾਗਵਤ ਦੇ ਰਾਮ ਮੰਦਰ, ਹਿੰਦੂਤਵ ਅਤੇ ਕੁੱਝ ਹੋਰ ਮੁੱਦਿਆਂ ਬਾਰੇ ਦਿਤੇ ਗਏ ਬਿਆਨਾਂ 'ਤੇ ਕਾਂਗਰਸ ਨੇ ਕਿਹਾ ਹੈ ਕਿ ਚਾਹੇ ਕੁੱਝ ਵੀ ਹੋ ਜਾਵੇ, ਕਿਸੇ ਜਥੇਬੰਦੀ ਜਾਂ ਵਿਅਕਤੀ ਦਾ ਡੀਐਨਏ ਨਹੀਂ ਬਦਲ ਸਕਦਾ। ਪਾਰਟੀ ਬੁਲਾਰੇ ਮਨੀਸ਼ ਤਿਵਾੜੀ ਨੇ ਇਹ ਵੀ ਦੋਸ਼ ਲਾਇਆ ਕਿ ਚੋਣਾਂ ਨੇੜੇ ਆਉਣ 'ਤੇ ਭਾਜਪਾ ਅਤੇ ਸੰਘ ਦੇ ਆਗੂ ਰਾਮ ਮੰਦਰ ਦੀ ਗੱਲ ਕਰਨ ਲਗਦੇ ਹਨ। ਉਨ੍ਹਾਂ ਕਿਹਾ, 'ਸੰਘ ਦਾ ਰੁਖ਼ 370 ਬਾਰੇ ਨਹੀਂ ਮਿਲਿਆ ਪਰ 377 ਬਾਰੇ ਬਦਲ ਗਿਆ ਹੈ। ਇਨ੍ਹਾਂ ਦੋ ਗੱਲਾਂ ਵਿਚ ਵਿਰੋਧਾਭਾਸ ਹੈ। ਚਾਹੇ ਕੁੱਝ ਵੀ ਹੋ ਜਾਵੇ ਪਰ ਕਿਸੇ ਵਿਅਕਤੀ ਜਾਂ ਜਥੇਬੰਦੀ ਦਾ ਡੀਐਨਏ ਨਹੀਂ ਬਦਲ ਸਕਦਾ।'
ਰਾਮ ਮੰਦਰ ਦੇ ਨਿਰਮਾਣ ਸਬੰਧੀ ਭਾਗਵਤ ਦੇ ਬਿਆਨ ਬਾਰੇ ਤਿਵਾੜੀ ਨੇ ਕਿਹਾ, 'ਇਸ ਵਿਚ ਕੁੱਝ ਵੀ ਨਵਾਂ ਨਹੀਂ। ਸਾਲ 1986 ਤੋਂ 2018 ਦਾ ਇਤਿਹਾਸ ਚੁੱਕ ਕੇ ਵੇਖ ਲਉ। ਭਾਜਪਾ ਅਤੇ ਸੰਘ ਦੇ ਸਿਖਰਲੇ ਆਗੂਆਂ ਨੇ ਹਮੇਸ਼ਾ ਚੋਣਾਂ ਤੋਂ ਪਹਿਲਾਂ ਰਾਮ ਮੰਦਰ ਦੀ ਗੱਲ ਕੀਤੀ ਹੈ। ਜਦ ਚੋਣਾਂ ਆਉਂਦੀਆਂ ਹਨ ਤਾਂ ਇਨ੍ਹਾਂ ਨੂੰ ਰਾਮ ਮੰਦਰ ਦੀ ਯਾਦ ਆ ਜਾਂਦੀ ਹੈ।' ਇਕ ਹੋਰ ਸਵਾਲ ਦੇ ਜਵਾਬ ਵਿਚ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦਾ ਮੰਨਣਾ ਹੈ ਕਿ ਦੇਸ਼ ਵਿਚ ਰਹਿਣ ਵਾਲਾ ਹਰ ਵਿਅਕਤੀ ਭਾਰਤੀ ਹੈ। ਹਰ ਵਿਅਕਤੀ ਦੀ ਖੇਤਰੀ ਅਤੇ ਧਾਰਮਕ ਪਛਾਣ ਹੁੰਦੀ ਹੈ ਪਰ ਸਾਰੇ ਲੋਕ ਭਾਰਤੀ ਹਨ। (ਏਜੰਸੀ)
