ਸਾਰੀਆਂ ਫਰਮਾਂ ਵਿਚ ਸਿਰਫ਼ ਇਕ ਮੋਬਾਈਲ ਨੰਬਰ ਹੀ ਕੀਤਾ ਦਰਜ ਸੀ, ਜਿਥੋਂ ਰੈਕੇਟ ਦਾ ਹੋਇਆ ਪਰਦਾਫਾਸ਼
ਜਲੰਧਰ: ਜੀਐਸਟੀ ਵਿਭਾਗ ਦੇ ਜਲੰਧਰ ਮੋਬਾਈਲ ਵਿੰਗ ਦੇ ਅਧਿਕਾਰੀਆਂ ਨੇ ਜਾਅਲੀ ਫਰਮਾਂ ਬਣਾ ਕੇ ਜੀਐਸਟੀ ਰਿਫੰਡ ਦੀ ਚੋਰੀ ਕਰਨ ਦਾ ਵੱਡਾ ਮਾਮਲਾ ਫੜਿਆ ਹੈ। ਇਨ੍ਹਾਂ ਲੋਕਾਂ ਨੇ ਨਾ ਤਾਂ ਕੁਝ ਖਰੀਦਿਆ ਅਤੇ ਨਾ ਹੀ ਵੇਚਿਆ। ਇਨ੍ਹਾਂ ਲੋਕਾਂ ਨੇ ਫਰਜ਼ੀ ਦਸਤਾਵੇਜ਼ਾਂ ਦੇ ਆਧਾਰ 'ਤੇ 144 ਫਰਮਾਂ ਬਣਾਈਆਂ ਸਨ। ਇਨ੍ਹਾਂ ਸਾਰੀਆਂ ਫਰਮਾਂ ਵਿਚ ਸਿਰਫ਼ ਇਕ ਮੋਬਾਈਲ ਨੰਬਰ ਹੀ ਦਰਜ ਸੀ, ਜਿੱਥੋਂ ਇਹ ਰੈਕੇਟ ਫੜਿਆ ਗਿਆ।
ਇਹ ਵੀ ਪੜ੍ਹੋ: ਫਰੀਦਕੋਟ ਪੁਲਿਸ ਦੀ ਵੱਡੀ ਲਾਪਰਵਾਹੀ, ਹਸਪਤਾਲ ਤੋਂ ਭੱਜਿਆ ਬੰਬੀਹਾ ਗਰੁੱਪ ਦਾ ਗੁਰਗਾ
ਇਹ ਲੋਕ ਧੋਖੇ ਨਾਲ ਇਕ ਫਰਮ ਦਾ ਬਿੱਲ ਦੂਜੀ ਫਰਮ ਦੇ ਨਾਂ 'ਤੇ ਕੱਟ ਰਹੇ ਸਨ। ਕੱਪੜਾ ਬਣਾਉਣ ਦਾ ਜਾਅਲੀ ਕਾਰੋਬਾਰ ਦਿਖਾਇਆ, ਜਿਸ ਵਿਚ ਦਸਿਆ ਗਿਆ ਕਿ ਉਹ ਇਕ ਦੂਜੇ ਨੂੰ ਜਲੰਧਰ ਤੋਂ ਲੁਧਿਆਣਾ ਅਤੇ ਅੱਗੇ ਦੁਬਈ ਵਿਚ ਬਰਾਮਦ ਕੀਤੇ ਕੱਪੜੇ ਵੇਚ ਰਹੇ ਹਨ। ਇਸ ਟਰਨਓਵਰ ਦੇ ਆਧਾਰ 'ਤੇ GST ਰਿਫੰਡ ਲਾਗੂ ਕੀਤਾ ਗਿਆ ਸੀ। ਇਸ ਤੋਂ ਪਹਿਲਾਂ ਜਦੋਂ ਵਿਭਾਗ ਨੇ ਟੈਕਸ ਰਿਕਾਰਡ ਦੀ ਪੜਤਾਲ ਕੀਤੀ ਤਾਂ ਸਾਰਾ ਮਾਮਲਾ ਫੜਿਆ ਗਿਆ।
ਇਹ ਵੀ ਪੜ੍ਹੋ:ਨਸ਼ੇ ਨੇ ਉਜਾੜਿਆ ਇਕ ਹੋਰ ਘਰ, ਨਸ਼ੇ ਦੀ ਓਵਰਡੋਜ਼ ਨਾਲ ਨੌਜਵਾਨ ਦੀ ਗਈ ਜਾਨ
ਜਲੰਧਰ ਦੇ ਮੋਬਾਇਲ ਵਿੰਗ ਨੇ ਰੈਡੀਮੇਡ ਕੱਪੜਿਆਂ ਦੀ ਬਰਾਮਦਗੀ ਕਰਨ ਵਾਲੀ ਇਕ ਫਰਮ ਦੇ ਸਟਾਕ ਨਾਲ ਭਰੇ ਟਰੱਕ ਨੂੰ ਰੋਕਿਆ, ਜਿਸ ਦੀ ਜਾਂਚ ਤੋਂ ਬਾਅਦ ਲਿੰਕ ਜੁੜਦੇ ਰਹੇ। ਇਸ ਮਾਮਲੇ 'ਚ 3.65 ਕਰੋੜ ਰੁਪਏ ਦਾ ਜੁਰਮਾਨਾ ਲਗਾਇਆ ਗਿਆ ਹੈ, ਜੋ ਕਿ ਪੰਜਾਬ 'ਚ ਇਕ ਵਾਹਨ 'ਤੇ ਲਗਾਇਆ ਗਿਆ ਹੁਣ ਤੱਕ ਦਾ ਸਭ ਤੋਂ ਵੱਡਾ ਜੁਰਮਾਨਾ ਹੈ। ਜੀਐਸਟੀ ਵਿਭਾਗ ਦੀ ਇੰਟੈਲੀਜੈਂਸ ਐਂਡ ਪ੍ਰੀਵੈਂਟਿਵ ਯੂਨਿਟ ਨੇ ਜ਼ਬਤ ਕੀਤੇ ਟਰੱਕ ਵਿਚ ਰੱਖੇ ਸਟਾਕ ਦੇ ਬਿੱਲਾਂ 'ਤੇ ਰਜਿਸਟਰਡ ਫਰਮ ਦੇ ਨਾਮ ਅਤੇ ਅੱਜ ਤੱਕ ਦੇ ਕਾਰੋਬਾਰੀ ਅੰਕੜਿਆਂ ਦਾ ਕਈ ਦਿਨਾਂ ਤੱਕ ਅਧਿਐਨ ਕੀਤਾ ਸੀ।
ਇਹ ਜਾਅਲੀ ਫਰਮਾਂ ਇਕ ਦੂਜੇ ਦੇ ਨਾਂ 'ਤੇ ਬਿੱਲ ਕੱਟ ਰਹੀਆਂ ਸਨ। ਇਸ ਦੌਰਾਨ ਪਤਾ ਲੱਗਾ ਕਿ 144 ਫਰਮਾਂ ਦੇ ਮਾਲਕਾਂ ਦਾ ਮੋਬਾਇਲ ਨੰਬਰ ਇਕ ਹੀ ਸੀ ਪਰ ਇਨ੍ਹਾਂ ਦੇ ਮਾਲਕਾਂ ਦੇ ਆਧਾਰ ਕਾਰਡ ਆਦਿ ਸਮੇਤ ਵੱਖ-ਵੱਖ ਪਤੇ ਸਨ। ਪਤਾ ਲੱਗਾ ਕਿ ਰੈਡੀਮੇਡ ਕੱਪੜਿਆਂ ਦੀ ਵਿਕਰੀ ਅਤੇ ਖਰੀਦਦਾਰੀ ਸਿਰਫ ਫਰਜ਼ੀ ਕਾਗਜ਼ਾਂ 'ਤੇ ਹੀ ਦਿਖਾਈ ਜਾ ਰਹੀ ਹੈ। ਹੁਣ ਇਸ ਮਾਮਲੇ ਦੀ ਅਗਲੇਰੀ ਜਾਂਚ ਹੋਵੇਗੀ, ਜਿਸ ਵਿਚ ਹਰੇਕ ਫਰਮ ਵਲੋਂ ਦਿਖਾਏ ਗਏ ਕਾਰੋਬਾਰ, ਜੀ.ਐਸ.ਟੀ. ਰਿਫੰਡ ਅਤੇ ਕਿਸ ਗਾਰੰਟੀ ਦੇ ਆਧਾਰ 'ਤੇ ਫਰਮਾਂ ਦਾ ਗਠਨ ਕੀਤਾ ਗਿਆ ਹੈ, ਬਾਰੇ ਪਤਾ ਲਗਾਇਆ ਜਾਵੇਗਾ। ਜਿਸ ਤੋਂ ਬਾਅਦ ਟੈਕਸ ਚੋਰੀ ਦੇ ਵੱਡੇ ਖੁਲਾਸੇ ਹੋਣ ਦੀ ਸੰਭਾਵਨਾ ਹੈ। ਫਰਜ਼ੀ ਫਰਮਾਂ ਨਾਲ ਕਾਰੋਬਾਰ ਕਰਨ ਵਾਲੇ ਸਾਰੇ ਲੋਕਾਂ ਦੇ ਜੀਐਸਟੀ ਰਿਫੰਡ ਦੀ ਜਾਂਚ ਕੀਤੀ ਜਾ ਸਕਦੀ ਹੈ।
