ਸੁਰੱਖਿਆ ਬਲਾਂ ਵਲੋਂ ਕੀਤੀ ਕਾਰਵਾਈ ਦੌਰਾਨ ਬਿਸ਼ਨੂਪੁਰ ਤੇ ਥੌਬਲ ਤੋਂ ਹਥਿਆਰ ਅਤੇ ਗੋਲਾ ਬਾਰੂਦ ਹੋਇਆ ਬਰਾਮਦ
ਅੱਤਵਾਦੀਆਂ ਵਲੋਂ ਮਨੀਪੁਰ ਦੇ ਇੰਫ਼ਾਲ ਪੱਛਮੀ ਦੇ ਪਿੰਡਾਂ ਵਿਚ ਇਕ ਵੱਡਾ ਹਮਲਾ ਕੀਤਾ ਗਿਆ। ਇਸ ਹਮਲੇ ਦੌਰਾਨ ਅਤਿਵਾਦੀਆਂ ਨੇ ਰਾਤ ਨੂੰ ਕਰੀਬ 1 ਵਜੇ ਕਈ ਰਾਊਂਡ ਫ਼ਾਇਰ ਕੀਤੇ ਅਤੇ ਬੰਬ ਵੀ ਸੁੱਟੇ, ਜਿਸ ਕਾਰਨ ਕੱਚੇ ਘਰਾਂ ਵਿਚ ਰਹਿ ਰਹੇ ਕਈ ਪਿੰਡਾਂ ਦੇ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ਵਲ ਭੱਜਣਾ ਪਿਆ।
ਸੁਰੱਖਿਆ ਬਲਾਂ ਦੀ ਕਾਰਵਾਈ ਦੌਰਾਨ ਬਿਸ਼ਨੂਪੁਰ ਤੇ ਥੌਬਲ ਤੋਂ ਹਥਿਆਰ ਤੇ ਗੋਲਾ ਬਾਰੂਦ ਬਰਾਮਦ ਹੋਇਆ। ਪੁਲਿਸ ਨੇ ਦਸਿਆ ਕਿ ਅੱਤਵਾਦੀਆਂ ਨੇ ਕਰੀਬ 1 ਵਜੇ ਕੰਗਪੋਕਪੀ ਜ਼ਿਲੇ੍ਹ ਦੇ ਪਹਾੜੀ ਖੇਤਰਾਂ ਤੋਂ ਆਧੁਨਿਕ ਹਥਿਆਰਾਂ ਨਾਲ ਕਈ ਰਾਊਂਡ ਫ਼ਾਇਰ ਕੀਤੇ ਤੇ ਬੰਬ ਸੁੱਟੇ।
ਇਸ ਮਾਮਲੇ ਵਿਚ ਪਿੰਡ ਦੇ ਵਲੰਟੀਅਰਾਂ ਨੇ ਜਵਾਬੀ ਕਾਰਵਾਈ ਕੀਤੀ ਅਤੇ ਸਥਿਤੀ ਨੂੰ ਕਾਬੂ ਕਰਨ ਲਈ ਵਾਧੂ ਸੁਰੱਖਿਆ ਬਲ ਭੇਜੇ ਗਏ। ਹਾਲਾਂਕਿ ਇਸ ਹਮਲੇ ’ਚ ਕਿਸੇ ਦੇ ਜ਼ਖ਼ਮੀ ਹੋਣ ਦੀ ਕੋਈ ਖ਼ਬਰ ਨਹੀਂ ਹੈ।
ਅੱਤਵਾਦੀਆਂ ਦੇ ਇਸ ਹਮਲੇ ਕਾਰਨ ਕੱਚੇ ਘਰਾਂ ’ਚ ਰਹਿਣ ਵਾਲੇ ਕਈ ਪਿੰਡ ਵਾਸੀਆਂ ਨੂੰ ਸੁਰੱਖਿਅਤ ਥਾਵਾਂ ’ਤੇ ਭੱਜਣਾ ਪਿਆ। ਇਸ ਦੇ ਨਾਲ ਹੀ ਮਣੀਪੁਰ ਦੇ ਬਿਸ਼ਨੂਪੁਰ ਅਤੇ ਥੌਬਲ ਜ਼ਿਲ੍ਹਿਆਂ ਵਿਚ ਚਲਾਏ ਗਏ ਸਰਚ ਆਪਰੇਸ਼ਨ ਦੌਰਾਨ ਸੁਰੱਖਿਆ ਬਲਾਂ ਨੇ ਭਾਰੀ ਮਾਤਰਾ ਵਿਚ ਹਥਿਆਰ ਤੇ ਗੋਲਾ ਬਾਰੂਦ ਜ਼ਬਤ ਕੀਤਾ ਹੈ।
ਸੁਰੱਖਿਆ ਬਲਾਂ ਨੇ ਮੰਗਲਵਾਰ ਨੂੰ ਬਿਸ਼ਨੂਪੁਰ ਜ਼ਿਲ੍ਹੇ ਦੇ ਥੋਂਗਖੋਂਗਲੋਕ ਪਿੰਡ ਤੋਂ ਇਕ ਐਸਐਲਆਰ, 303 ਰਾਈਫ਼ਲ, 12 ਬੋਰ ਸਿੰਗਲ ਬੈਰਲ ਬੰਦੂਕ, ਦੋ 9 ਐਮਐਮ ਪਿਸਤੌਲ, ਦੰਗਾ ਵਿਰੋਧੀ ਬੰਦੂਕ, ਇੰਸਾਸ ਐਲਐਮਜੀ ਅਤੇ ਰਾਈਫਲ ਮੈਗਜ਼ੀਨ, ਹੈਂਡ ਗ੍ਰਨੇਡ, ਡੈਟੋਨੇਟਰ ਅਤੇ ਹੋਰ ਚੀਜ਼ਾਂ ਜ਼ਬਤ ਕੀਤੀਆਂ।
ਇਸ ਦੇ ਨਾਲ ਹੀ ਸੁਰੱਖਿਆ ਬਲਾਂ ਨੇ ਥੌਬਲ ਜ਼ਿਲੇ੍ਹ ਦੇ ਲੀਸ਼ਾਂਗਥੇਮ ਆਈਕੋਪ ਪੈਟ ਇਲਾਕੇ ਤੋਂ ਇਕ ਐਂਟੀ ਮਟੀਰੀਅਲ ਰਾਈਫ਼ਲ, ਸਨਾਈਪਰ ਦ੍ਰਿਸ਼ ਸਕੋਪ, ਸਿੰਗਲ ਬੋਲਟ ਐਕਸ਼ਨ ਰਾਈਫ਼ਲ, ਸਵਦੇਸ਼ੀ ਪਿਸਤੌਲ, ਹੈਂਡ ਗ੍ਰਨੇਡ ਅਤੇ ਗੋਲਾ ਬਾਰੂਦ ਜ਼ਬਤ ਕੀਤਾ ਹੈ।
ਇਸ ਦੇ ਨਾਲ ਹੀ ਪੁਲਿਸ ਨੇ ਮਣੀਪੁਰ ਦੇ ਹਿੰਸਾ ਪ੍ਰਭਾਵਿਤ ਇੰਫ਼ਾਲ ਪੂਰਬੀ ਜ਼ਿਲ੍ਹੇ ਵਿਚ ਬੰਗਾਲੀ ਕ੍ਰਾਸਿੰਗ ਨੇੜੇ ਜ਼ਬਰਦਸਤੀ ਦੇ ਇੱਕ ਮਾਮਲੇ ਵਿੱਚ ਵੀ ਕਾਰਵਾਈ ਕੀਤੀ।
ਇਸ ਦੌਰਾਨ ਸੁਰੱਖਿਆ ਬਲਾਂ ਨੇ ਕਾਂਗਲੀਪਕ ਕਮਿਊਨਿਸਟ ਪਾਰਟੀ (ਪੀਪਲਜ਼ ਵਾਰ ਗਰੁੱਪ) ਦੇ ਇਕ ਮੈਂਬਰ ਨੂੰ ਮੰਤਰੀਪੁਖਾਰੀ ਬਾਜ਼ਾਰ ਤੋਂ ਗ੍ਰਿਫ਼ਤਾਰ ਕੀਤਾ, ਜੋ ਕਿ ਜਬਰੀ ਵਸੂਲੀ ਵਿਚ ਸ਼ਾਮਲ ਸੀ। ਉਸ ਕੋਲੋਂ 9 ਐਮਐਮ ਦੀ ਪਿਸਤੌਲ, ਮੈਗਜ਼ੀਨ ਅਤੇ ਹੋਰ ਸਾਮਾਨ ਬਰਾਮਦ ਕੀਤਾ ਗਿਆ ਹੈ।
