ਸਦਭਾਵਨਾ ਯਾਤਰਾ' ਰਾਹੀਂ ਸੰਭਾਲਣਗੇ ਪਿਤਾ ਦੀ ਵਿਰਾਸਤ, ਪੱਛਮੀ ਚੰਪਾਰਨ ’ਚ ਪਾਰਟੀ ਵਰਕਰਾਂ ਵਲੋਂ ਭਰਵਾਂ ਸਵਾਗਤ
ਪਟਨਾ : ਬਿਹਾਰ ਦੇ ਸਾਬਕਾ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਦੇ ਪੁੱਤਰ ਨਿਸ਼ਾਂਤ ਕੁਮਾਰ ਨੇ ਸਰਗਰਮ ਸਿਆਸਤ ਵਿੱਚ ਰਸਮੀ ਤੌਰ 'ਤੇ ਆਪਣਾ ਪਹਿਲਾ ਕਦਮ ਰੱਖ ਦਿੱਤਾ ਹੈ। ਐਤਵਾਰ ਨੂੰ ਆਪਣੀ ਪਹਿਲੀ ਜਨਤਕ ਸੰਪਰਕ ਮੁਹਿੰਮ 'ਸਦਭਾਵਨਾ ਯਾਤਰਾ' ਦੀ ਸ਼ੁਰੂਆਤ ਕਰਦਿਆਂ ਉਨ੍ਹਾਂ ਨੇ ਪੱਛਮੀ ਚੰਪਾਰਨ ਦੇ ਵਾਲਮੀਕਿ ਨਗਰ ਵੱਲ ਰੁਖ਼ ਕੀਤਾ। ਇਸ ਮੌਕੇ ਜਨਤਾ ਦਲ (ਯੂਨਾਈਟਿਡ) ਦੇ ਵਰਕਰਾਂ ਨੇ ਉਨ੍ਹਾਂ ਦਾ ਭਰਵਾਂ ਸਵਾਗਤ ਕੀਤਾ।
ਨਿਸ਼ਾਂਤ ਕੁਮਾਰ ਨੇ ਆਪਣੇ ਸਫ਼ਰ ਦੀ ਸ਼ੁਰੂਆਤ ਆਪਣੇ ਪਿਤਾ ਦਾ ਆਸ਼ੀਰਵਾਦ ਲੈ ਕੇ ਕੀਤੀ। ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਉਨ੍ਹਾਂ ਕਿਹਾ, "ਮੇਰੀ ਪਹਿਲੀ ਸਿਆਸੀ ਯਾਤਰਾ, ਸਦਭਾਵਨਾ ਯਾਤਰਾ, ਅੱਜ ਤੋਂ ਸ਼ੁਰੂ ਹੋ ਰਹੀ ਹੈ। 'ਸਦਭਾਵਨਾ' ਸ਼ਬਦ ਪਿਆਰ ਅਤੇ ਸਕਾਰਾਤਮਕ ਭਾਵਨਾਵਾਂ ਦਾ ਪ੍ਰਤੀਕ ਹੈ। ਮੈਂ ਸਾਰਿਆਂ ਨੂੰ ਨਾਲ ਲੈ ਕੇ ਚੱਲਾਂਗਾ, ਕਿਸੇ ਨੂੰ ਵੀ ਪਿੱਛੇ ਨਹੀਂ ਛੱਡਿਆ ਜਾਵੇਗਾ।"
45 ਸਾਲ ਦੇ ਨਿਸ਼ਾਂਤ, ਜੋ ਹੁਣ ਤੱਕ ਸਿਆਸਤ ਤੋਂ ਦੂਰ ਰਹੇ ਹਨ, ਹਾਲ ਹੀ ਵਿੱਚ ਪਾਰਟੀ ਵਿੱਚ ਸ਼ਾਮਲ ਹੋਏ ਹਨ। ਇਹ ਕਦਮ ਨਿਤੀਸ਼ ਕੁਮਾਰ ਵੱਲੋਂ ਮੁੱਖ ਮੰਤਰੀ ਦਾ ਅਹੁਦਾ ਛੱਡ ਕੇ ਰਾਜ ਸਭਾ ਵਿੱਚ ਜਾਣ ਦੇ ਫੈਸਲੇ ਤੋਂ ਬਾਅਦ ਲਿਆ ਗਿਆ ਹੈ। ਜੇਡੀਯੂ ਦੇ ਬੁਲਾਰੇ ਨੀਰਜ ਕੁਮਾਰ ਨੇ ਨਿਸ਼ਾਂਤ ਦੀ ਤਾਰੀਫ਼ ਕਰਦਿਆਂ ਕਿਹਾ, "ਨਿਸ਼ਾਂਤ ਉਸ ਧਰਤੀ ਨਾਲ ਸਬੰਧ ਰੱਖਦੇ ਹਨ ਜਿੱਥੇ ਸਮਰਾਟ ਅਸ਼ੋਕ ਦਾ ਜਨਮ ਹੋਇਆ ਸੀ... ਉਨ੍ਹਾਂ ਨੇ ਸੱਤਾ ਦੇ ਸ਼ਾਰਟਕੱਟ ਚੁਣਨ ਦੀ ਬਜਾਏ ਜਨਤਕ ਸੰਪਰਕ ਰਾਹੀਂ ਆਪਣੀ ਜਗ੍ਹਾ ਬਣਾਉਣ ਦਾ ਫੈਸਲਾ ਕੀਤਾ ਹੈ।"
ਯਾਤਰਾ ਦੌਰਾਨ ਨਿਸ਼ਾਂਤ ਉਸੇ ਖੁੱਲ੍ਹੀ ਗੱਡੀ ਦੀ ਵਰਤੋਂ ਕਰ ਰਹੇ ਹਨ ਜਿਸ ਨੂੰ ਉਨ੍ਹਾਂ ਦੇ ਪਿਤਾ ਵਰਤਦੇ ਸਨ, ਜਿਸ ਦਾ ਨਾਂ ਹੁਣ 'ਸਦਭਾਵ ਰਥ' ਰੱਖਿਆ ਗਿਆ ਹੈ। ਪਾਰਟੀ ਨੂੰ ਉਮੀਦ ਹੈ ਕਿ ਨਿਸ਼ਾਂਤ ਆਪਣੇ ਪਿਤਾ ਦੀ 'ਅਪਰਾਧ, ਭ੍ਰਿਸ਼ਟਾਚਾਰ ਅਤੇ ਸੰਪਰਦਾਇਕਤਾ' ਵਿਰੁੱਧ ਜ਼ੀਰੋ ਟੋਲਰੈਂਸ ਦੀ ਨੀਤੀ ਨੂੰ ਅੱਗੇ ਵਧਾਉਣਗੇ।
