'ਫਰਨੀਚਰ ਅਤੇ ਬਰਤਨਾਂ ਦੀ ਵਰਤੋਂ ਮੰਦਰ ਦੇ ਵੀਆਈਪੀ ਗੈਸਟ ਹਾਊਸ ਲਈ ਕੀਤੀ ਜਾਵੇਗੀ'

ਤਿਰੂਪਤੀ: ਇੱਕ ਮੁਸਲਮਾਨ ਸ਼ਰਧਾਲੂ ਨੇ ਤਿਰੂਪਤੀ ਬਾਲਾਜੀ ਦੇ ਮੰਦਰ ਨੂੰ ਇੱਕ ਕਰੋੜ ਰੁਪਏ ਦਾਨ ਕੀਤੇ ਹਨ। ਅਬਦੁਲ ਗਨੀ ਅਤੇ ਨੁਬੀਨਾ ਬਾਨੋ ਨੇ ਤਿਰੁਮਾਲਾ ਤਿਰੂਪਤੀ ਦੇਵਸਥਾਨਮ (ਟੀਟੀਡੀ) ਨੂੰ ਚੈੱਕ ਭੇਟ ਕੀਤੇ ਅਤੇ ਪੰਡਿਤਾਂ ਨੂੰ ਮੰਦਰ ਦੇ ਕੰਮਾਂ ਵਿੱਚ ਸਹਿਯੋਗ ਕਰਨ ਲਈ ਕਿਹਾ। ਦਾਨ ਵਿੱਚ ਨਵੇਂ ਬਣੇ ਪਦਮਾਵਤੀ ਰੈਸਟ ਹਾਊਸ ਲਈ 87 ਲੱਖ ਰੁਪਏ ਦਾ ਫਰਨੀਚਰ ਅਤੇ ਭਾਂਡੇ ਅਤੇ ਐੱਸਵੀ ਅੰਨਾ ਪ੍ਰਸਾਦਮ ਟਰੱਸਟ ਲਈ 15 ਲੱਖ ਰੁਪਏ ਦਾ ਡਿਮਾਂਡ ਡਰਾਫਟ ਸ਼ਾਮਲ ਹੈ। 

ਮੰਦਰ ਦੇ ਇਕ ਅਧਿਕਾਰੀ ਨੇ ਬੁੱਧਵਾਰ ਨੂੰ ਦੱਸਿਆ ਕਿ ਇਸ ਮੁਸਲਿਮ ਉਪਾਸਕ ਦਾ ਨਾਂ ਅਬਦੁਲ ਗਨੀ ਹੈ ਅਤੇ ਪਿਛਲੇ ਤਿੰਨ ਦਹਾਕਿਆਂ ਤੋਂ ਉਹ ਮੰਦਰ ਨੂੰ ਵਾਹਨ, ਫਰਨੀਚਰ ਅਤੇ ਨਕਦੀ ਦਾਨ ਕਰਦਾ ਆ ਰਿਹਾ ਹੈ। ਗਨੀ ਆਪਣੇ ਪਰਿਵਾਰ ਸਮੇਤ ਮੰਗਲਵਾਰ ਨੂੰ ਮੰਦਰ ਪਹੁੰਚੇ ਅਤੇ 15 ਲੱਖ ਰੁਪਏ ਦੇ ਚੈੱਕ ਦੇ ਨਾਲ ਤਿਰੁਮਾਲਾ ਤਿਰੂਪਤੀ ਦੇਵਸਥਾਨਮ (ਟੀਟੀਡੀ) ਨੂੰ 87 ਲੱਖ ਰੁਪਏ ਦਾ ਫਰਨੀਚਰ ਅਤੇ ਸਮਾਨ ਦਾਨ ਕੀਤਾ।

 ਅਧਿਕਾਰੀ ਨੇ ਦੱਸਿਆ ਕਿ ਭੇਟ ਕੀਤੇ ਗਏ ਇਨ੍ਹਾਂ ਫਰਨੀਚਰ ਅਤੇ ਬਰਤਨਾਂ ਦੀ ਵਰਤੋਂ ਮੰਦਰ ਦੇ ਵੀਆਈਪੀ ਗੈਸਟ ਹਾਊਸ ਲਈ ਕੀਤੀ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਨਕਦ ਦਾਨ ਦੀ ਵਰਤੋਂ ਟੀਟੀਡੀ ਦੁਆਰਾ ਚਲਾਏ ਜਾ ਰਹੇ ਸ਼੍ਰੀ ਵੈਂਕਟੇਸ਼ਵਰ ਅੰਨਾਪ੍ਰਸਾਦ ਟਰੱਸਟ ਲਈ ਕੀਤੀ ਜਾਵੇਗੀ। ਇਹ ਸ਼ਰਧਾਲੂਆਂ ਨੂੰ ਮੁਫਤ ਭੋਜਨ ਪ੍ਰਦਾਨ ਕਰਨ ਲਈ ਲਾਭਦਾਇਕ ਹੋਵੇਗਾ।

ਜ਼ਿਕਰਯੋਗ ਹੈ ਕਿ 1984 ਵਿੱਚ ਹੈਦਰਾਬਾਦ ਦੇ ਇੱਕ ਮੁਸਲਿਮ ਭਗਤ ਨੇ ਸੋਨੇ ਦੇ 108 ਕਮਲ ਭੇਟ ਕੀਤੇ ਸਨ ਅਤੇ ਟੀਟੀਡੀ ਨੂੰ ਇਨ੍ਹਾਂ ਫੁੱਲਾਂ ਨੂੰ ਪਵਿੱਤਰ ਅਸਥਾਨ ਵਿੱਚ ਭਗਵਾਨ ਵੈਂਕਟੇਸ਼ ਦੇ ਚਰਨਾਂ ਵਿੱਚ ਸਮਰਪਿਤ ਕਰਨ ਦੀ ਅਪੀਲ ਕੀਤੀ ਸੀ।ਮੁਸਲਿਮ ਉਪਾਸਕਾਂ ਤੋਂ ਤੋਹਫ਼ੇ ਪ੍ਰਾਪਤ ਕਰਨ ਤੋਂ ਬਾਅਦ, ਟੀਟੀਡੀ ਨੇ ਮੰਦਰ ਵਿੱਚ ਇੱਕ ਵਿਸ਼ੇਸ਼ ਦਾਨ ਪ੍ਰਣਾਲੀ 'ਅਸ਼ਟਦਲਾ ਪਦਾ ਪਦਮਰਥਨਾ' ਸ਼ੁਰੂ ਕੀਤੀ।