‘ਟ੍ਰਾਈਕੋਫੈਜੀਆ’ ਨਾਂ ਦੀ ਮਾਨਸਿਕ ਬੀਮਾਰੀ ਕਾਰਨ ਕਰਨੀ ਪਈ ਸਰਜਰੀ

ਲਖਨਊ/ਬਰੇਲੀ : ਉੱਤਰ ਪ੍ਰਦੇਸ਼ ਦੇ ਬਰੇਲੀ ਜ਼ਿਲ੍ਹੇ ਦੇ ਕਰਗੈਨਾ ਦੀ ਰਹਿਣ ਵਾਲੀ 21 ਸਾਲ ਦੀ ਔਰਤ ਮਾਨਸਿਕ ਵਿਕਾਰ ਕਾਰਨ ਪਿਛਲੇ 16 ਸਾਲਾਂ ਤੋਂ ਅਪਣੇ ਵਾਲ ਖਾ ਰਹੀ ਸੀ, ਜਿਸ ਦੇ ਨਤੀਜੇ ਵਜੋਂ ਉਸ ਦੇ ਪੇਟ ਵਿਚ ਲਗਭਗ ਦੋ ਕਿਲੋ ਵਾਲ ਜਮ੍ਹਾ ਹੋ ਗਏ ਸਨ ਅਤੇ ਇਨ੍ਹਾਂ ਨੂੰ ਹਟਾਉਣ ਲਈ 26 ਸਤੰਬਰ ਨੂੰ ਆਪਰੇਸ਼ਨ ਕੀਤਾ ਗਿਆ।

ਬਰੇਲੀ ਦੇ ਜ਼ਿਲ੍ਹਾ ਹਸਪਤਾਲ ਦੇ ਡਾਕਟਰਾਂ ਮੁਤਾਬਕ ਉਹ ‘ਟ੍ਰਾਈਕੋਫੈਜੀਆ’ ਨਾਂ ਦੀ ਮਾਨਸਿਕ ਬਿਮਾਰੀ ਤੋਂ ਪੀੜਤ ਹੈ, ਜਿਸ ’ਚ ਮਰੀਜ਼ ਅਪਣੇ ਵਾਲ ਖਾਣਾ ਸ਼ੁਰੂ ਕਰ ਦਿੰਦਾ ਹੈ। ਉਨ੍ਹਾਂ ਕਿਹਾ ਕਿ ਔਰਤ ਦੇ ਪੇਟ ’ਚ ਵਾਲ ਜਮ੍ਹਾ ਹੋਣ ਕਾਰਨ ਉਸ ਦੇ ਪੇਟ ਦੀ ਗੁਹਾੜੀ ਅਤੇ ਉਸ ਦੀ ਅੰਤੜੀ ਦੇ ਕੁੱਝ ਹਿੱਸੇ ਵੀ ਬੰਦ ਹੋ ਗਏ ਸਨ। 

ਇਹ ਬਿਮਾਰੀ 20 ਸਤੰਬਰ ਨੂੰ ਸਾਹਮਣੇ ਆਈ ਜਦੋਂ ਕੁੜੀ ਦਾ ਪਰਵਾਰ ਬਰੇਲੀ ਦੇ ਜ਼ਿਲ੍ਹਾ ਹਸਪਤਾਲ ਗਿਆ ਅਤੇ ਸੀ.ਟੀ. ਸਕੈਨ ਰੀਪੋਰਟ ’ਚ ਉਸ ਦੇ ਪੇਟ ’ਚ ਵਾਲਾਂ ਦਾ ਢੇਰ ਵਿਖਾਇਆ ਗਿਆ। ਜਦੋਂ ਇਸ ਗੱਲ ਦਾ ਪ੍ਰਗਟਾਵਾ ਹੋਇਆ ਤਾਂ ਹਸਪਤਾਲ ਦੇ ਡਾਕਟਰ ਵੀ ਹੈਰਾਨ ਰਹਿ ਗਏ। 

ਬਰੇਲੀ ਜ਼ਿਲ੍ਹਾ ਹਸਪਤਾਲ ਦੇ ਸਰਜਨ ਡਾਕਟਰ ਐਮ.ਪੀ. ਸਿੰਘ ਨੇ ਦਸਿਆ ਕਿ ‘ਟ੍ਰਾਈਕੋਫੈਜੀਆ’ ਇਕ ਮਾਨਸਿਕ ਵਿਕਾਰ ਹੈ, ਜਿਸ ਕਾਰਨ ਮਰੀਜ਼ ਨੂੰ ਅਪਣੇ ਵਾਲ ਖਾਣ ਦੀ ਆਦਤ ਪੈ ਜਾਂਦੀ ਹੈ। ਉਨ੍ਹਾਂ ਕਿਹਾ, ‘‘ਲੜਕੀ ਦੇ ਪੇਟ ’ਚ ਇਕ ਗੰਢ ‘ਟ੍ਰਾਈਕੋਫੈਜੀਆ’ ਬਿਮਾਰੀ ਦਾ ਸੰਕੇਤ ਦਿੰਦੀ ਹੈ। ਇਸ ਲਈ ਲੜਕੀ ਨੂੰ ਕਈ ਪੜਾਵਾਂ ’ਚ ਸਲਾਹ ਦਿਤੀ ਗਈ। ਮਨੋਚਿਕਿਤਸਕ ਡਾਕਟਰ ਆਸ਼ੀਸ਼ ਕੁਮਾਰ ਅਤੇ ਡਾ. ਪ੍ਰਗਿਆ ਮਹੇਸ਼ਵਰੀ ਵਲੋਂ ਕਾਊਂਸਲਿੰਗ ਕੀਤੀ ਗਈ ਸੀ ਅਤੇ ਬਾਅਦ ’ਚ ਉਸ ਨੇ ਮੰਨਿਆ ਕਿ ਉਹ ਪੰਜ ਸਾਲ ਦੀ ਉਮਰ ਤੋਂ ਹੀ ਅਪਣੇ ਸਿਰ ’ਤੇ ਵਾਲਾਂ ਦੀ ਆਦੀ ਸੀ।’’

ਨਤੀਜੇ ਵਜੋਂ, ਉਸ ਦੇ ਪੇਟ ’ਚ ਲਗਭਗ ਦੋ ਕਿਲੋ ਵਾਲ ਜਮ੍ਹਾਂ ਹੋ ਗਏ ਸਨ, ਜਿਨ੍ਹਾਂ ਨੂੰ 26 ਸਤੰਬਰ ਨੂੰ ਇਕ ਆਪਰੇਸ਼ਨ ਤੋਂ ਬਾਅਦ ਹਟਾ ਦਿਤਾ ਗਿਆ ਸੀ। ਡਾਕਟਰ ਮੁਤਾਬਕ ਲੜਕੀ ਦੇ ਪੇਟ ’ਚ ਵਾਲਾਂ ਦੀ ਮਾਤਰਾ ਇੰਨੀ ਜ਼ਿਆਦਾ ਸੀ ਕਿ ਵਾਲਾਂ ਨੇ ਉਸ ਦੇ ਪੇਟ ਅਤੇ ਇੱਥੋਂ ਤਕ ਕਿ ਉਸ ਦੀ ਅੰਤੜੀ ਦੇ ਕੁੱਝ ਹਿੱਸਿਆਂ ਨੂੰ ਪੂਰੀ ਤਰ੍ਹਾਂ ਘੇਰ ਲਿਆ ਸੀ। 

ਸਰਜਨ ਨੇ ਕਿਹਾ ਕਿ ਔਰਤ ਠੋਸ ਚੀਜ਼ਾਂ ਖਾਣ ਦੇ ਯੋਗ ਨਹੀਂ ਸੀ ਅਤੇ ਉਹ ਤਰਲ ਭੋਜਨ ਵੀ ਉਲਟੀਆਂ ਕਾਰਨ ਬਾਹਰ ਆ ਰਹੀ ਸੀ। 

ਮਨੋਵਿਗਿਆਨਕ ਵਿਕਾਰ ਅਤੇ ਇਸ ਨਾਲ ਜੁੜੇ ਪਹਿਲੂਆਂ ’ਤੇ ਚਾਨਣਾ ਪਾਉਂਦਿਆਂ ਉਨ੍ਹਾਂ ਕਿਹਾ, ‘‘ਮਰੀਜ਼ ਨੂੰ ਜੋ ਮਨੋਵਿਗਿਆਨਕ ਸਮੱਸਿਆ ਸੀ, ਉਸ ਨੂੰ ‘ਟ੍ਰਾਈਕੋਫੈਜੀਆ’ ਕਿਹਾ ਜਾਂਦਾ ਹੈ। ਇਸ ’ਚ ਮਰੀਜ਼ ਅਪਣੇ ਸਿਰ ਦੇ ਵਾਲਾਂ ਨੂੰ ਖਾਣਾ ਸ਼ੁਰੂ ਕਰ ਦਿੰਦਾ ਹੈ। ਇਸ ਦੇ ਨਤੀਜੇ ਵਜੋਂ ‘ਗੈਸਟ੍ਰਿਕ ਬੇਜੋਰ’ ਦਾ ਵਿਕਾਸ ਹੁੰਦਾ ਹੈ। ਇਸ ਦੇ ਮੁੱਖ ਲੱਛਣ ਉਲਟੀਆਂ ਅਤੇ ਪੇਟ ਦੇ ਉੱਪਰਲੇ ਹਿੱਸੇ ’ਚ ਦਰਦ ਹਨ।’’

ਡਾਕਟਰ ਨੇ ਕਿਹਾ ਕਿ ਪੇਟ ’ਚ ਵਾਲਾਂ ਦਾ ਗੋਲਾ ਬਣਨ ਨਾਲ ਗੰਭੀਰ ਸਿਹਤ ਚਿੰਤਾਵਾਂ ਹੋ ਸਕਦੀਆਂ ਹਨ ਅਤੇ ਐਮਰਜੈਂਸੀ ਸਰਜਰੀ ਦੀ ਲੋੜ ਪੈ ਸਕਦੀ ਹੈ। ਇਸ ਦੌਰਾਨ ਮਾਪਿਆਂ ਨੇ ਡਾਕਟਰਾਂ ਨੂੰ ਦਸਿਆ ਕਿ ਉਨ੍ਹਾਂ ਦੀ ਬੇਟੀ ਗੁਪਤ ਤਰੀਕੇ ਨਾਲ ਉਸ ਦੇ ਵਾਲ ਤੋੜ ਕੇ ਖਾਂਦੀ ਸੀ ਅਤੇ ਉਹ ਜਾਣਦੀ ਸੀ ਕਿ ਅਜਿਹਾ ਕਰਨਾ ਅਜੀਬ ਹੈ, ਫਿਰ ਵੀ ਉਹ ਅਜਿਹਾ ਕਰਦੀ ਰਹੀ। 

ਉਨ੍ਹਾਂ ਮੁਤਾਬਕ ਅਜਿਹਾ 16 ਸਾਲਾਂ ਤੋਂ ਹੋ ਰਿਹਾ ਸੀ। ਬਾਅਦ ’ਚ ਉਸ ਦੇ ਪੇਟ ’ਚ ਤੇਜ਼ ਦਰਦ ਹੋਣ ਲੱਗਾ। ਪਰਵਾਰਕ ਮੈਂਬਰਾਂ ਨੇ ਦਸਿਆ ਕਿ ਸ਼ੁਰੂ ’ਚ ਉਹ ਦਰਦ ਨਿਵਾਰਕ ਦਵਾਈਆਂ ਲੈਂਦੀ ਸੀ, ਪਰ ਬਾਅਦ ’ਚ ਉਹ ਦਵਾਈਆਂ ਵੀ ਬੇਅਸਰ ਹੋ ਗਈਆਂ, ਜਿਸ ਤੋਂ ਬਾਅਦ ਅਲਟਰਾਸਾਊਂਡ ਕੀਤਾ ਗਿਆ, ਪਰ ਸਥਿਤੀ ਸਪੱਸ਼ਟ ਨਹੀਂ ਸੀ। ਬਾਅਦ ’ਚ ਜ਼ਿਲ੍ਹਾ ਹਸਪਤਾਲ ’ਚ ਸੀ.ਟੀ. ਸਕੈਨ ਕੀਤਾ ਗਿਆ ਅਤੇ ਮਾਮਲਾ ਸਾਹਮਣੇ ਆਇਆ।