ਅਗੇਤੇ ਝੋਨੇ ਉਤੇ ਪੱਤਾ ਲਪੇਟ ਸੁੰਡੀ ਅਤੇ ਗਰਮੀ ਤੋਂ ਮਿਲੀ ਰਾਹਤ
ਸ੍ਰੀ ਮੁਕਤਸਰ ਸਾਹਿਬ(ਗੁਰਦੇਵ ਸਿੰਘ/ਰਣਜੀਤ ਸਿੰਘ) : ਲੰਬੀ ਉਡੀਕ ਤੋਂ ਬਾਅਦ ਲੱਗੀ ਮੀਂਹ ਦੀ ਝੜੀ ਨੇ ਕਿਸਾਨਾਂ ਦੇ ਚਿਹਰਿਆਂ ’ਤੇ ਜਿਥੇ ਖ਼ੁਸ਼ੀਆਂ ਲਿਆਂਦੀਆਂ ਹਨ ਉਥੇ ਪੈ ਰਹੀਂ ਅਤਿ ਦੀ ਗਰਮੀ ਤੋਂਂ ਆਮ ਲੋਕਾਂ ਨੂੰ ਵੱਡੀ ਰਾਹਤ ਪ੍ਰਧਾਨ ਕੀਤੀ ਹੈ। ਜ਼ਿਕਰਯੋਗ ਹੈ ਕਿ ਮਾਲਵੇ ਦੇ ਕੁਝ ਜ਼ਿਲ੍ਹਿਆਂ ਬਠਿੰਡਾ, ਮਾਨਸਾ, ਫ਼ਾਜ਼ਿਲਕਾ, ਮੁਕਤਸਰ ਸਾਹਿਬ, ਫ਼ਰੀਦਕੋਟ ਤੇ ਫ਼ਿਰੋਜ਼ਪੁਰ ਵਿਚ ਪਿਛਲੇ ਸਾਲਾਂ ਨਾਲੋਂ ਬਹੁਤ ਘੱਟ ਮੀਂਹ ਪਿਆ।
ਬੀਤੇ ਦਿਨੀ ਲੰਬੀ ਔੜ ਤੋਂ ਬਾਅਦ ਲੋੜ ਮੁਤਾਬਕ ਪਏ ਮੀਂਹ ਨੇ ਸੁੱਕ ਰਹੇ ਝੋਨੇ ਨੂੰ ਵੱਡੀ ਰਾਹਤ ਪ੍ਰਦਾਨ ਕੀਤੀ ਸੀ ਪਰ ਅਜੇ ਵੀਂ ਉਕਤ ਜ਼ਿਲ੍ਹਿਆਂ ਦੇ ਬਹੁਤ ਸਾਰੇ ਰਕਬੇ ਵਿਚ 126, 131 ਅਤੇ ਬਾਸਮਤੀ ਜੋ ਕੁਝ ਥਾਵਾਂ ’ਤੇ ਸੱਠੇ ਝੋਨੇ, ਮੱਕੀ ਵਾਲੀ ਜਗ੍ਹਾ ਕਰੀਬ ਅੱਧ ਜੁਲਾਈ ਤੋਂ ਬਾਅਦ ਲਗਾਈ ਜਾਂਦੀ ਹੈ, ਨੂੰ ਮੀਂਹ ਦੀ ਭਾਰੀ ਲੋੜ ਸੀ, ਜੋ ਇਸ ਝੜੀ ਨੇ ਇਕ ਵਾਰ ਪੂਰੀ ਕਰ ਦਿਤੀ ਹੈ।
ਅੱਧੀ ਰਾਤ ਤੋਂ ਲਗਾਤਾਰ ਰੁਕ-ਰੁਕ ਕੇ ਪੈ ਰਹੀਂ ਝੜੀ ਨੇ ਜਿੱਥੇ ਕਿਸਾਨਾਂ ਨੂੰ ਮੋਟਰਾਂ ਅਤੇ ਡੀਜ਼ਲ ਆਦਿ ਤੋਂ ਵੱਡੀ ਰਾਹਤ ਪ੍ਰਦਾਨ ਕੀਤੀ ਹੈ ਉੱਥੇ ਪਿਛੇਤੇ ਝੋਨਿਆਂ ਨੂੰ ਇਹ ਮੀਂਹ ਘਿਓ ਵਾਂਗ ਤਾਕਤ ਦੇਵੇਗੀ। ਜਦੋਂ ਕਿ ਅਗੇਤੇ ਝੋਨਿਆਂ ਨੂੰ ਪੈ ਰਹੀਂ ਪੱਤਾ ਲਪੇਟ ਸੁੰਡੀ ਵੀ ਇਸ ਮੀਂਹ ਨਾਲ ਖ਼ਤਮ ਹੋ ਸਕਦੀ ਹੈ ਅਤੇ ਕਿਸਾਨਾਂ ਨੂੰ ਪੱਤਾ ਲਪੇਟ ਤੋਂ ਸਪਰੇ ਕਰਨ ਦੀ ਜ਼ਰੂਰਤ ਨਹੀਂ ਪਵੇਗੀ।
ਮੀਂਹ ਨਾਲ ਝੋਨਾ ਅਤੇ ਨਰਮੇ ਦੀ ਫ਼ਸਲ ਪਹਿਲਾਂ ਨਾਲੋਂ ਤਾਕਤਵਰ ਹੋ ਕੇ ਸਾਹਮਣੇ ਆਵੇਗੀ। ਕਰੀਬ 70 ਤੋਂ 80 ਦਿਨਾਂ ਉਪਰੰਤ ਅਗੇਤੇ ਝੋਨੇ ਦਾ ਨਸਾਰਾ ਜੋ ਕਿ ਆਉਣ ਵਾਲੇ ਦਿਨਾਂ ਵਿਚ ਸ਼ੁਰੂ ਹੋਵੇਗਾ, ਨੂੰ ਵੀਂ ਇਸ ਮੀਂਹ ਦਾ ਭਾਰੀ ਲਾਭ ਹੋਣ ਦੀ ਉਮੀਦ ਬੱਝੀ ਹੈ। ਉਕਤ ਜ਼ਿਲ੍ਹਿਆਂ ਵਿਚ ਲੋੜ ਸਮੇਂ ਲੱਗੀ ਝੜੀ ਨਾਲ ਝੋਨੇ, ਬਾਸਮਤੀ ਤੇ ਨਰਮੇ ਦੀ ਫ਼ਸਲ ਚੰਗੀ ਹੋਣ ਦੀ ਉਮੀਦ ਕੀਤੀ ਜਾ ਸਕਦੀ ਹੈ।
