ਮਿਲੀ ਜਾਣਕਾਰੀ ਹੁਣ ਤਕ 13 ਹਜ਼ਾਰ ਮੀਟਰਕ ਟਨ ਕਣਕ ਮੰਡੀਆਂ ਵਿਚ ਆ ਚੁੱਕੀ ਹੈ।
ਚੰਡੀਗੜ੍ਹ (ਭੁੱਲਰ) : ਮੌਸਮ ਦੀ ਖ਼ਰਾਬੀ ਦੇ ਚਲਦਿਆਂ ਪੰਜਾਬ ਦੀਆਂ ਮੰਡੀਆਂ ਵਿਚ ਕਣਕ ਦੀ ਆਮਦ ਦੀ ਰਫ਼ਤਾਰ ਹਾਲੇ ਹੌਲੀ ਹੈ। ਆੜ੍ਹਤੀਆਂ ਵਲੋਂ ਸਰਕਾਰ ਨਾਲ ਸਮਝੌਤਾ ਹੋ ਜਾਣ ਬਾਅਦ ਭਾਵੇਂ ਪਹਿਲਾਂ ਨਾਲੋਂ ਜ਼ਰੂਰ ਖ਼ਰੀਦ ਵਿਚ ਤੇਜ਼ੀ ਆਈ ਹੈ। ਮਿਲੀ ਜਾਣਕਾਰੀ ਹੁਣ ਤਕ 13 ਹਜ਼ਾਰ ਮੀਟਰਕ ਟਨ ਕਣਕ ਮੰਡੀਆਂ ਵਿਚ ਆ ਚੁੱਕੀ ਹੈ।
ਹਾਲੇ 13 ਅਪ੍ਰੈਲ ਤੋਂ ਬਾਅਦ ਹੀ ਮੰਡੀਆਂ ਵਿਚ ਕਣਕ ਦੀ ਖ਼ਰੀਦ ਦੇ ਕੰਮ ਵਿਚ ਤੇਜ਼ੀ ਆਵੇਗੀ ਕਿਉਂਕਿ ਮੌਸਮੀ ਬਾਰਿਸ਼, ਗੜੇਮਾਰੀ ਅਤੇ ਝੱਖੜ ਕਾਰਨ ਪਿਛਲੇ ਦਿਨਾਂ ਵਿਚ ਮਾਲਵੇ ਦੇ ਕਈ ਜ਼ਿਲ੍ਹਿਆਂ ਵਿਚ ਫ਼ਸਲਾਂ ਦਾ ਵੱਡਾ ਨੁਕਸਾਨ ਹੋਇਆ ਹੈ।
ਵਾਢੀ ਲਈ ਤਿਆਰ ਪੱਕੀ ਖੜੀ ਫ਼ਸਲ ਕਾਰਨ ਹਾਲੇ ਵਾਢੀ ਦਾ ਕੰਮ ਵੀ ਕੁੱਝ ਪਛੜ ਗਿਆ ਹੈ। ਜੋ ਕਣਕ ਵੱਢੀ ਗਈ ਹੈ, ਉਸ ਵਿਚ ਵੀ ਨਮੀ ਦੀ ਮਾਤਰਾ ਕੁੱਝ ਵੱਧ ਆਉਣ ਕਾਰਨ ਖ਼ਰੀਦ ਵਿਚ ਮੁਸ਼ਕਲ ਹੈ।
ਹਾਲੇ ਮੌਸਮ ਦਾ ਮਿਜਾਜ਼ ਬਦਲਿਆ ਨਹੀਂ ਅਤੇ ਅਗਲੇ ਇਕ ਦੋ ਦਿਨ ਵਿਚ ਹੋਰ ਬਾਰਿਸ਼ ਕਾਰਨ ਕਣਕ ਦੀ ਖ਼ਰੀਦ ਤੇ ਵਾਢੀ ਪ੍ਰਭਾਵਤ ਹੋ ਰਹੀ ਹੈ। ਇਸ ਵਾਰ ਸੂਬਾ ਸਰਕਾਰ ਨੇ 122 ਲੱਖ ਮੀਟਰਕ ਕਣਕ ਦੀ ਖ਼ਰੀਦ ਦਾ ਟੀਚਾ ਰੱਖਿਆ ਹੈ ਪਰ ਪਈ ਕੁਦਰਤੀ ਮਾਰ ਕਾਰਨ ਕਈ ਜ਼ਿਲ੍ਹਿਆਂ ਵਿਚ ਝਾੜ ਘੱਟਣ ਦਾ ਅਨੁਮਾਨ ਹੈ।
